कामप्रति उनको नयाँ शैली र सोचले व्यवसायलाई गतिमात्र दिएन, उनमा नेतृत्व क्षमता पनि प्रखर रुपमा विकास हुँदै गयो । उनी अहिले उदीयमान औद्योगिक तथा व्यापारिक घराना सरावगी ग्रुपको प्रबन्ध निर्देशक छन् । यस अलावा शिक्षा, स्वास्थ्य र वित्तीय संस्थाहरूमा उनको नेतृत्वदायी भूमिका छ । एसिया मेडिकल कलेज एण्ड टिचिङ हस्पिटल, एसियन लाइफ इन्सुरेन्स कम्पनी, ज्ञानदा एकेडेमीजस्ता सेवामूलक उद्यमहरू उनकै नेतृत्वका सफल उपक्रमहरू हुन् । विस २०७० सालतिर दलीय राजनीतिमा सक्रिय भएका सरावगी विद्यार्थीकालदेखि नै राजनीतिमा आवद्ध हुँदै आएका थिए ।अन्तरनिहित व्यवस्थापकीय दक्षता र नेतृत्व क्षमताकै कारण उनले उद्योग व्यापारमात्र होइन, निजीक्षेत्रका अग्रणी संस्था हुँदै मधेस प्रदेशको एकमात्र महानगर वीरगञ्जको नेतृत्व गर्न सक्षम भए । आर्थिक, सामाजिक र राजनीतिक परिवर्तनको उद्देश्यबाट ओतप्रोत सरावगीले विगतमा बारा र पर्सा जिल्लाका उद्यमी व्यापारीहरूको वर्गीय सस्था वीरगञ्ज उद्योग वाणिज्य संघको अध्यक्षको रुपमा नेतृत्व प्रदान गरे । संघको संस्थागत विकास र उद्यम व्यापारको हितका सन्दर्भमा उनको नेतृत्व अविस्मरणीय छ । 

वीरगञ्ज उद्योग वाणिज्य संघलाई कुशल अगुवाई गरेका सरावगी यतिमै रोकिएनन्, समग्र उद्योगी व्यापारीको छाता संस्था नेपाल उद्योग वाणिज्य महासंघमा ३ कार्यकाल कार्यकारिणी सदस्यको भूमिकामा रहे । महासंघमा व्यापार समितिको सहसंयोजक रहेर नेतृत्व गरेका सरावगी नेपाल–भारत मानव विकास तथा मैत्री संगठनमा उद्योग र व्यापार विभागका संयोजक हुन् । देश संघीय लोकतान्त्रिक गणतन्त्रको अभ्यासमा गएसँगै बि.स. २०७४ सालमा भएको स्थानीय तह निर्वाचनमा वीरगञ्ज महानगरको प्रमुखमा निर्वाचन लड्दै पूर्णकालीन राजनीतिमा होमिएका सरावगी एक कुशल नेतृत्वकर्ताको रुपमा स्थापित छन् ।